Tag und Nacht

Tag und Nacht

Damit der Mensch konn existiern
woit Gott de Finsternis halbiern
er hot an Dog mi'm Liacht erschaffa
und d'Nacht damit ma kenna schlafa.

So lang ma lebn is für uns Dog
verbunden mit vui Müah und Plog
falln uns für immer d'Äugerl zua
kimmt d'Finsternis und d'ewig Ruah.

Wia lang de ohoit woaß ma net
ebba so lang wia d'Welt besteht?
Des konn no dauern vui tausad Johr
oder ament für immer gor?

I möcht nur oans amoi erlebn,
mit meine Leit a Wiedersehn.
Mi plogt dabei a unguats Gfui
braucht mi d'Natur nur für ihr Gspui?

Falln mia aa ob wias Laub vom Baam
wars Lebn net nur a kurzer Traam
do gibts a Kraft, de in uns steckt
und de uns amoi auferweckt.

(Verfasser unbekannt)